موسم سڈنی کا اور بیاں اپنا

ہو سکتا ہے کہ آپ کو یہ عجیب لگے مگر سچ یہی ہے کہ جو مزہ مادری زبان میں بات کرنے کا ہے وہ کسی اور بولی میں نہیں، بقول آتش

ع زبان غیر سے کیا شرح آرزو کرتے

سو ہم نے یہ سوچا کہ یہ بلاگ ہے اور یہاں اگراردو میں ابتدا کی جاے تو پڑھنے والوں کو لاگ آن ہونے کے بعد اس سے لگن ہو سکتی ہے. اب ذھن میں کچھ خاص مضمون نہیں ہے سوکچھ حال سڈنی کے موسم کا بیان کرتے ہیں بقول غالب

کلکتہ کا جو ذکر کیا تُو نے ہمنشیں
اِک تیرمیرے سینے میں مارا کہ ہاے ہاے

سڈنی سے جانے کے بعد شاید ہم بھی چچا غالب کے ہمنوا ہوں. خیر بات ہو رہی تھی یہاں کے موسم کی تو دوستو سب سے پہلی بات تو یہ ہے کہ آسٹریلیا تاج برطانیہ کے زیر سایہ رہنے کے با وجود بھی اپنا موسم الگ رکھتا ہےاور یہاں کے باسیوں کو جنوبی نصف کرہ میں ہونے کے کارن ایشیا اور یورپ کے بالعکس موسمی حالات کا سامنہ کرنا پڑتا ہیں. یعنی مئی، جون، جولائی، اگست موسم سرما کے مہینے ہیں، اسی طرح دیگر موسم بھی ہیں. یہ بات خاصی عجیب سی لگتی ہےجبتکہ آپ اس کا تجربہ نہ کر لیں. یہاں تک تو بات سمجھ میں آتی ہے مگر سڈنی کا موسم تو انسانوں کے بدلنے سے بھی زیادہ تیزی سے بدل جاتا ہے. اگر ایک دن ٣٥ درجہ تو اگلے ہی روز ٢٠ درجہ (یہ ہم موسم گرما کا ذکر کر رہے ہیں). ابھی کل ہی کی بات ہے اچھا خاصا موسم تھا نہ سرد نہ گرم اور آج ٢٢ درجہ ہو گیا ہے کہ سردی محسوس ہونے لگی. ان دنوں یہاں پر پت جھڑ کا موسم ہے اور عنقریب سردی آیا چاہتی ہے. سڈنی سمندر کے کنارے آباد ہے بلکہ بقول پطرس ساحل سڈنی کے کنارے واقع ہے یوں یہاں پر باد صبا کے ساتھ ساتھ نسیم بحر بھی رواں رہتی ہے.

یہاں کی برسات بھی نرالی ہے گو کہ بن بادل نہیں ہوتی مگر ہوتی ہے تو خوب ہوتی ہے کہ گویا برستی جاے ہے مسلسل برسات آھستہ آھستہ.

پچھلے ماہ کی بارش کئی برسوں کی برسات پر بازی لے گئی اور سڑک پر کوڑے کے ڈرم آب باراں میں ترتے پاے گئے.

پاے تو چینی بھی جاتے ہیں سڈنی میں کہ مومن سے معذرت کے ساتھ تم مرے پاس والے شعر میں 'تم' سے مراد چینی ہیں.

سو دوستو سڈنی کا موسم اپنی انفرادیت کے ساتھ ہر برس قریبا ٢٦ ہفتے بارش لاتا ہے یعنی ٥٠ فیصد ہفتہ وار تعطیل پر آپ کپڑے نہیں سوکھا سکتے. تو اگر آپ سفر سڈنی کا قصد رکھتے ہیں تو اس بلاگ سے فائدہ اٹھا سکتے ہیں.

آپ کی آرا کا انتظار رہے گا